Олунньу 13 күнүгэр, Төрөөбүт төрүт тыл уонна сурук-бичик күнүн чэрчитинэн, Усуйаана улууһун Депутатскай бөһүөлэгэр сахалыы дьыктаан ыытылынна.
Үгэс буолбут дьыктаан Усуйаанатааҕы кииннэммит бибилэтиэкэ тэрийиитинэн ааҕар саалаҕа буолла. Дьыктаан ыытыытын бибилэтиэкэ хотуна Туйаара Сэмиэнэбэ сүрүннээтэ, салайда:
– Бастаан дьыктаан буолуон иннинэ оҕо ускуустубатын оскуолатын оҕолоро мустубут дьоҥҥо музыкальнай нүөмэрдэри бэлэхтээтилэр. ”Алгыс баһа сыаланнын” диэн ырыаны Маша Слепцова сахалыы сайаҕастык ыллаан чаҕаарда, онтон хомуска Саина Григорьева оонньоон дьүрүһүттэ
Ол кэнниттэн дьыктааны оҕо ускуустубатын оскуолатын фольклор салаатын уһуйааччыта Евдокия Васильева аахта. Амма Аччыгыйа “Аймалҕан” диэн айымньытынан Евдокия Семеновна дьыктааны аахпытын мустубут дьон кыһанан суруйдулар.
– Маннык дьыктааннар саха тыла сайдыытыгар, сайыннарыытыгар олус туһалаахтар. Элбэх эдэр ыччат кэлбитэ миигин үөртэ, – диир Акулина Романовна Дьячковская, улуус үөрэҕириитин управлениетын хотуна, саха тыла үөрэхтээҕэ.
Источник: Уйбаан Өндүрүөйэп, Газета «Заря Яна»
Подробнее: https://ulus.media/2021/02/13/deputatskajga-sahalyy-dyktaan-buolla/
